👦🏻今晚個天幾清喎，大犬座、小犬座同獵戶座嘅亮星組成嘅冬季大三角都睇到哂！ 👩🏻吓？咩嚟㗎，啲星座名咁陌生嘅…我1月尾出世，咁係咪可以睇到屬於我個水瓶座？
古時嘅人類已經會用想像力將天空上面星羅棋布嘅星星串連做星座，並為佢地編織咗神話故事。地球自轉加上圍繞太陽公轉會令到我哋睇上去太陽同背後嘅恆星有周而復始嘅軌跡。日常所聽嘅十二星座，就係西方天文學入面88個星座之中，太陽一年間會經過嘅星座，亦被稱為黃道十二宮，分別係白羊座、金牛座、雙子座、巨蟹座、獅子座、處女座、天秤座、天蠍座、射手座、摩羯座、水瓶座同雙魚座，除此之外仲有蛇夫座都會被太陽經過。
你係邊個星座視乎你出世嗰時太陽行到去邊個星座 ─ 喺占星學起源當時，1月尾嘅時候太陽位於水瓶座，因此1月中到2月中出世嘅人就屬於水瓶座啦。講多樣嘢你知丫，受到歲差嘅影響，其實現今21世紀1月尾嘅時候太陽已經處於鄰近嘅摩羯座。佢哋同樣被耀眼嘅陽光遮掩而睇唔到，因此喺你生日前後係唔會睇到你所屬嘅星座㗎，如果想睇水瓶座就要等到夏天啦！
了解更多